الكرتونه الانتخابية

الجزء الثانى


- سمع حسن صوت واهن يقول : انا حي انا حي خش يالي بتخبط انا حي لسه عايش يا نااااااااس
فدلف حسن الى الغرفه وقال : بركه يا عم الحي والحي دي ايه ذكر الحيه ولا ايه يا عم انت مالك متخزن هنا من فتره ولا ايه
- لا يا ابني انا وحداني ياليل وحداني الشغلانه دي محدش بيمر عليا خالص وبشتغل 12 ساعه مع اني محدش بيجيلي هي الساعه كام دلوقتي لحسن سحبوا الساعه بتاعتي عشان طلعت بتزود لوحدها من غير تراخيص
- يا عم ركز معايا ساعة ايه وتراخيص ايه انا دلوقتي عاوز اطلع كرتونه انتخابيه .... وانت شكلك كدا طالع من العنايه المركزه !
- لا يا بيه انا طالع من العنايه المخففه هاهاها اخيرا لاقيت حد اكلمه انا مش مصدق وانت عشان من اول خمسه جم يطلعوا كرتونه انتخابيه من عندي انا هظبطك واخلصك علطول ... انت معاك بطاقه ؟ ولا مسحوبه هي كمان؟
- لا يا عم الحاج البطاقه جاهزه وكله تمام حتى الرقم الوطني اهوه ومجددها للقرن الجاي عشان لو حصل انتخابات جديده ولا حاجه امال ايه يا با احنا جاهزين ومستعدين لاي ظرف ولو لازقولنا عليه طابع حتى مسعتدين يا باشا
- ماشي يا سيدي خلي معاك انت الظرف بتاعك هات البطاقه دي وريني الاسم : حسن زؤليطه ... تاريخ الميلاد : 2002 !!! انت عندك 8 سنين يا حسن وجاي تتطلع كرتونه انتخابيه
- 8 سنين ايه يا باشا لا انا اصلا مواليد 75 بس عملت ابديت عند الحكومه لتاريخ ميلادي فبقيت 2002 فهمت .
- اه اذا كان كدا معلش خلاص يا حسن فوت عليا كمان 3 سنين تكون البطاقه خلصت وهتستلمها وتلحق تنتخب
- 3 سنين ايه يا عم بقولك الانتخابات دلوقت انت شكلك واقع في ترعة الزمن من قعدتك دي يا عم الحاج انا عاوزاها في اسبوع وخد جوز الجنيهات دي هاتلك فنضام للاولاد..
- ماشي يا عم هات ما من الاول اهرشني لازم يعني اقولك 3 سنين فوت بعد اسبوع هتلاقيها جاهزه ...
- لا يا عم انا مش عاوزها جاهزه
- امال عاوزها ايه ؟
- عاوزها تفصيل هاهاها
- ايه يا ابني الخفه دي حاسب لتطير وانت ماشي وحط في جيبك طوبتين ولا حاجه فوت بعد اسبوع وهتلاقيها جاهزه يا حبيبي
وخرج حسن من المبنى على امل ان يحصل على الكرتونه الانتخابيه في ميعادها وعاد بعد اسبوع للموظف ووجده كما هو وطرق على الباب نق نق مره اخرى ودخل على الموظف قائلا في بهجه : هاي يا مان ايه عملتلي ايه بقه في حوار الكرتونه ..
فرد عليه الموظف : يو يو ازيك انت يا مان انا كله تمام (ايم مناديل) .
- مناديل ايه اسمها فاين فاين ام الجهل بتاعكم ده عملتلي ايه يا معلم في الكرتونه بتاعتي
- كله تمام اتفضل يا سيدي كرتونتك الانتخابيه اهيه انت دخلت الموسوعه انت تاني واحد في البلد يطلع كرتونه انتخابيه وعشان كدا اسمك هيتسجل في التاريخ
- امال مين الاول يا حباية قلبي من جوه ؟
فقام الموظف من مكانه مذعورا ووضع يده على قلبه وقال : السيد الرئيس
فبربش حسن بعينه وزاغت قليلا ورد : رئيس ايه بالظبط ؟
فرد الموظف في بطئ وهو يلتفت حوليه : رئيس الحي طبعا يا جاهل
!